Nasabat ng Bureau of Customs (BOC) ang tinatayang P219.5 milyong halaga ng smuggled fuel sa isang operasyon sa La Union Port ngayong linggo.
Nahuli sa akto ng mga awtoridad nitong Huwebes ng gabi ang motor tanker na MT Bernadette habang naglilipat ng diesel patungo sa isang lorry truck. Ayon sa BOC, nadiskubre rin na may dalawa pang lorry truck na may lamang diesel fuel na nagmula sa naturang tanker.
Sa isinagawang imbentaryo nitong Biyernes, tinatayang nasa 200,000 litro ng diesel ang nasa tanker, habang may 19,000 litro at 40,000 litro naman sa dalawang truck. Sa kabuuan, umabot sa 259,000 litro ang ipinuslit na fuel. Hindi nakapagpakita ng anumang dokumento ang 10 tripulante ng MT Bernadette upang patunayan ang legalidad ng kanilang aktibidad.
Kasamang inaresto ang drayber, porter, lookout, at iba pang kasabwat sa operasyon, dahilan upang umabot sa 21 ang kabuuang bilang ng mga nahuli. Agad na sinimulan ng National Bureau of Investigation – Organized and Transnational Crime Division (NBI-OTCD) ang pagproseso sa mga naaresto para sa inquest proceedings, habang nagpadala rin ng puwersa ang Philippine Army Security and Escort Battalion upang tumulong sa seguridad ng lugar.
Kasama sa operasyon ang Customs Intelligence and Investigation Services mula sa Manila International Container Port at Philippine Coast Guard Task Force Aduana. Ang mga may-ari, kapitan ng barko, crew, at mga sangkot na indibidwal ay nahaharap sa mga kasong kriminal at administratibo alinsunod sa Customs Modernization and Tariff Act (CMTA) at TRAIN Law.Bookmark messageCopy messageExport